საღამოს გამოსვლაში უკრაინის პრეზიდენტმა ვლადიმირ ზელენსკიმ ისაუბრა კიევის მორიგ დაბომბვაზე, რის შედეგადაც „მსოფლიოს მეორე არმიამ დაბომბა საბავშვო ბაღი და საცხოვრებელი შენობა“. საცხოვრებელ კორპუსზე დარტყმის შედეგად ერთი მამაკაცი დაიღუპა, მისი ცოლ-შვილი კი დაშავდა. გარდაცვლილის მეუღლე რუსეთის მოქალაქეა.

„მას ჩვენს ქვეყანაში არაფერი ემუქრებოდა, სანამ რუსეთი სხვაგვარად არ გადაწყვეტდა“, - განაცხადა ზელენსკიმ.

ამის შემდეგ უკრაინის ლიდერი რუსულზე გადავიდა და რუს სამხედროებს და ბელორუსის მოქალაქეებს მიმართა.

„უპირველეს ყოვლისა, ყველა პილოტმა, დისპეტჩერმა, ტექნიკოსმა და სხვა ადამიანებმა, რომლებიც უზრუნველყოფენ რაკეტების გაშვებას უკრაინაში, უნდა გაიაზროს: ჩვენ ყველას გიპოვით. ყველა პასუხს აგებს ამ თავდასხმებზე. თუ ვინმე ფიქრობს, რომ თავს აარიდებს პასუხისმგებლობას, იტყვის. რომ ასეთი იყო ბრძანება, თქვენ ცდებით. სასამართლო პროცესი არის ის, რაც გელოდებათ ყველას. და თქვენ ვერსად დაიმალებით.ვერც კასპიის ზღვის სანაპიროზე, საიდანაც  რაკეტებს უშვებთ, ვერც ბელარუსში.
მინდა, მივმართო ბელარუსის მოქალაქეებს დღეს. ხალხს - როგორც მშვიდობიან მოქალაქეებს, ასევე, ფორმაში ჩაცმულებს. თქვენ გიბიძგებენ ომში. და კიდევ უფრო აქტიურად, ვიდრე ეს იყო თებერვალში და გაზაფხულის თვეებში. კრემლმა უკვე გადაწყვიტა ყველაფერი შენთვის. შენი სიცოცხლე მათთვის არაფერია. მაგრამ თქვენ არ ხართ მონები და არ ხართ ქვემეხის საკვები. არ უნდა მოკვდეთ. და თქვენ გაქვთ ძალა არავის მისცეთ უფლება გადაწყვიტოს რა გელოდებათ შემდეგ.",- თქვა ზელენსკიმ. 

ცნობისთვის, უკრაინის ოფიციალურმა პირებმა განაცხადეს, რომ რუსულმა ძალებმა უკრაინის წინააღმდეგ უახლესი დარტყმები ბელორუსიიდან განახორციელეს. ამ ქვეყნის არმია მუდმივად ატარებს მანევრებს უკრაინის საზღვრებთან, რითაც ცდილობს, გადაიტანოს უკრაინის შეიარაღებული ძალების ყურადღება, რომელიც იბრძვის რუსეთის ჯარებთან.