გამოცემა Sova-ს მთავარი რედაქტორი, მართა არდაშელია ამბობს, რომ რუსეთის ფედერაციის საგარეო საქმეთა სამინისტროს დაფინანსებით ჩატარებულ სემინარზე თანხები მოსკოვიდან თბილისში ერთ-ერთი გერმანული ბანკის მეშვეობით გადმოირიცხა. 
პრორუსული სემინარი თბილისში, ერთ-ერთ სასტუმროში გუშინ, 20 ივნისს იმართებოდა.

"ჩვენმა ჟურნალისტმა შეძლო ამ ღონისძიებაზე შესვლა, მათ უყვებოდნენ ისტორიის იმ ვერსიას, რომელსაც პუტინის რეჟიმი ტირაჟირებს და რომლისთვისაც რუსული ჯარი იბრძვის უკრაინაში. საუკეთესო მოსწავლეებს  შესთავაზებდნენ  უფასო სწავლებას რუსეთის უმაღლეს სასწავლებლებში. თანხები ამ ღონისძიების ორგანიზებისთვის მოსკოვიდან გადმოირიცხა თბილისში ერთ-ერთი გერმანული ბანკის მეშვეობით, რომელმაც სანქციების შემდეგ გააგრძელა თავისი ოპერირება რუსეთის ტერიტორიაზე", - თქვა მართა არდაშელიამ.

სწორედ გამოცემა Sova-მ გაასაჯაროვა პირველად ინფორმაცია იმის შესახებ, რომ რუსეთის ფედერაციის საგარეო საქმეთა სამინისტროს დაფინანსებით თბილისში ღონისძიება იმართებოდა.
რუსეთის საგარეო საქმეთა სამინისტროს დაორგანიზებული და დაფინანსებული შეკრება სახელწოდებით "ახალგაზრდა სამართალმცოდნეები", თბილისში, აღმაშენებლის ქუჩაზე მდებარე სასტუმრო "იბისიში" უნდა ჩატარებულიყო. სასტუმროს ადმინისტრაციას განმარტება არ გაუკეთებია. ადგილზე კრიტიკული მედიის გამოჩენის შემდეგ სემინარის მონაწილეებმა პოლიცია გამოიძახეს. საბოლოოდ ღონისძიება ჩაიშალა.