უნგრეთის პრემიერმინისტრი, ვიქტორ ორბანი მხარს უჭერს უკრაინასა და მოლდოვას ევროკავშირის კანდიდატის სტატუსის მინიჭებას, მაგრამ თვლის, რომ ეს სტატუსი ასევე უნდა მიენიჭოს საქართველოს და ბოსნია/ჰერცეგოვინას - განაცხადა უნგრეთის პრემიერმინისტრის ოფისში სახელმწიფო მდივნის მოადგილემ, ბერტალან ჰავასიმ.

„ვიქტორ ორბანი დაეთანხმა ევროკავშირის წინადადებას უკრაინასა და მოლდოვას ევროკავშირის წევრობის კანდიდატის სტატუსის მინიჭების შესახებ. თუმცა, მან დასძინა, რომ უნგრეთი, რამდენიმე სხვა წევრ სახელმწიფოსთან ერთად, თვლის, რომ საქართველომ და ბოსნიამაც უნდა მიიღონ წევრობის სტატუსი"- ნათქვამია პრესსამსახურის განცხადებაში, რომელიც განთავსებულია ვებგვერდზე. 

ცნობისთვის, ეს განცხადება ორბანმა ვიდეოკონფერენციაზე გააკეთა, რომელსაც ევროპული საბჭოს პრეზიდენტი, შარლ მიშელიც ესწრებოდა. უნგრეთის პრემიერის ადმინისტრაციის ცნობით, შეხვედრას,ასევე, დაესწრნენ: ბელგიის, ბულგარეთის, ესტონეთის, ლუქსემბურგისა და მალტის პრემიერ-მინისტრები.