რუსი ოკუპანტები სევეროდონეცკში შეღწევას ცდილობდნენ, თუმცა დანაკარგი განიცადეს და უკან დაიხიეს, - ამის შესახებ ლუგანსკის ოლქის გუბერნატორი, სერგეი გაიდაი Telegram-ში წერს.

"რუსებმა სცადეს სევეროდონეცკში შეჭრა ოთხივე მხრიდან, მაგრამ ღირსეული პასუხი მიიღეს და უკან დაიხიეს. მტერმა განახორციელა შეტევითი ოპერაციები ოსკოლონივკას, პურდივკას, შცედრიშჩევოსა და სმოლიანინოვოს რაიონებში... საცხოვრებელი უბნების საარტილერიო დაბომბვა გრძელდება.  დაზარალდა თითქმის ყველა კონტროლირებადი დასახლება. სევეროდონეცსკა და ლისიჩანსკს შორის, მატარებლის სადგურთან ახლოს დანგრეულია ხიდი", - ამბობს გაიდაი.

მისივე ცნობით, გუშინ უკრაინის უსაფრთხოების სამსახურმა დააკავა რამდენიმე პირი, რომლებიც უკრაინულ სამხედრო ტექნიკას სურათებს უღებდნენ.
გაიდაიმ ასევე აღნიშნა, რომ დღის განმავლობაში სევეროდონეცკში ოკუპანტებმა შვიდი სახლი დააზიანეს, ლისიჩანსკში - 5. ასევე, 5 სახლი განადგურდა ტოშკოვკასა და ნიკროვოში, 4 - ვრუბივკაში, 3 - გირსკსა და ზოლოტოვოში, 1 - პრივილში. ამ დრომდე არ არის დაზუსტებული ნოვოდრუჟესკის დაბომბვის შედეგად დანგრეული სახლების რაოდენობა, ასევე ვრუბოვკაში მტრის საჰაერო დარტყმით მიყენებული ზარალი.