რუსეთის საგარეო საქმეთა მინისტრი, სერგეი ლავროვი ამბობს, რომ უკრაინაში "სპეციალური ოპერაციის მორიგი ეტაპი" დაიწყო - ამის შესახებ ინტერვიუ მან "indiatoday-ს" მისცა. ლავროვმა თქვა, რომ უკრაინაში "სპეცოპერაციის" ახალი ეტაპი დონეცკისა და ლუგანსკის სრულ გათავისუფლებას ისახავს მიზნად.
ლავროვმა თქვა, რომ რუსეთმა სტამბოლში გამართული მოლაპარაკებების შემდეგ უკრაინაში ჯარების კონფიგურაცია შეცვალა, მაგრამ მსოფლიომ ეს არ დააფასა. 

„ოპერაცია აღმოსავლეთ უკრაინაში მიზნად ისახავს, როგორც უკვე გამოცხადდა თავიდანვე, დონეცკისა და ლუგანსკის რესპუბლიკების სრულ გათავისუფლებას. ეს ოპერაცია გაგრძელდება და ვფიქრობ, ახლა მნიშვნელოვანი მომენტი ეს იქნება “, - თქვა მან.

ამავე ინტერვიუში ჟურნალისტის კითხვაზე, განიხილავს თუ არა რუსეთი ბირთვული იარაღის გამოყენებას, ლავროვმა უპასუხა: „მხოლოდ ჩვეულებრივი იარაღი“. 
კრეისერ "მოსკოვის" ჩაძირვის შესახებ დასმულ კითხვას კი ლავროვმა უპასუხა, რომ  „ეს თავდაცვის სამინისტროს საქმეა, ახსნეს რაც მოხდა, ამას ვერაფერს დავამატებ“.