ნატოს გაფართოების საკითხი ამჟამად დღის წესრიგში არ დგას. ამის შესახებ გერმანიის კანცლერმა ოლაფ შოლცმა რუსეთის პრეზიდენტთან ვლადიმერ პუტინთან შეხვედრის შემდეგ განაცხადა.
„ნატოს გაფართოების საკითხის განხილვა არ იგეგმება, ეს საკითხი არ განიხილება. ის ამჟამად დღის წესრიგში არ დგას. ამ თემით არ დავკავდებით, ვიდრე თითოეული ჩვენგანი ვიქნებით ამ თანამდებობებზე“, - განაცხადა გერმანიის კანცლერმა შეხვედრის შემდეგ გამართულ პრესკონფერენციაზე.
შოლცმა განაცხადა, რომ რუსეთის მიერ თვითგამოცხადებული დონეცკისა და ლუგანსკის ე.წ. სახალხო რესპუბლიკების აღიარება გახდება პოლიტიკური კატასტროფა, რომელიც დაარღვევს მინსკის შეთანხმებას.
„ეს ნიშნავს, რომ პროცესი შეწყდება, რაც იქნება პოლიტიკური კატასტროფა“ , - განაცხადა კანცლერმა.
პუტინი-შოლცის დღევანდელი შეხვედრა კრემლში სამ საათზე მეტ ხანს გაგრძელდა.
რუსეთის დუმამ დღეს კენჭი უყარა პრეზიდენტისდმი მიმართვას, თვითგამოცხადებული დონეცკისა და ლუგანსკის ე.წ. სახალხო რესპუბლიკების დამოუკიდებლობის აღიარების აუცილებლობის შესახებ.