ერთიანი ნაციონალური მოძრაობის ერთ-ერთი ლიდერი, ხატია დეკანოიძე ყოფილი გამომძიებლის, მარიანა ჩოლოიანის ვადაზე ადრე გათავისუფლებას ეხმაურება. დეკანოიძე წერს, რომ არსებული "მახინჯი" სისტემის ყველაზე მანკიერი თვისება სწორედ მის შიგნით არსებული დამნაშავეების დაფარვაა.
"სიმართლე გითხრათ, გამომძიებელი ჩოლოიანის გათავისუფლება არ გამკვირვებია. ჩვენი მახინჯი სისტემის ყველაზე მანკიერი თვისებაა მის შიგნით არსებული დამნაშავეების დაფარვა. მარტო გამომძიებელი ქალი არ იყო დამნაშავე. იკვეთებოდა ბევრი სამართალდამცველის გულგრილობა და პასუხისმგებლობა, ამიტომ სისტემამ ხელი დააფარა სხვებს, ხოლო ვინც "დასაჯა" – ვადამდე ადრე ხარკის მოხდის მიზნით გამოუშვა.
ასე მუშაობს სისტემა – თავისიანებს არ სჯის. მისთვის სხვისი სიცოცხლე უფრო ნაკლებია, ვიდრე საკუთარის მხილება". – წერს დეკანოიძე.
ლუკა სირაძის საქმეში არასრულწლოვანისგან ჩვენების იძულებით მიღებაში ბრალდებული ყოფილი გამომძიებელი, მარიანა ჩოლოიანი პატიმრობიდან ვადაზე ადრე გაათავისუფლეს. ადვოკატის თქმით, ჩოლოიანი აკმაყოფილებდა გათავისუფლების ისეთ კრიტერიუმებს, როგორებიცაა სასჯელაღსრულების დაწესებულებაში ქცევა, შინაგანაწესის დაურღვევლობა და სხვა.