"მოქალაქეები" "TV პირველის" ჩანაწერების გამო, პარლამენტში საგამოძიებო კომისიის შექმნას მოითხოვენ
პარტია "მოქალაქეები", რომელიც პარლამენტში ორი მანდატით არის წარმოდგენილი, "TV პირველის" ეთერით გავრცელებული აუდიოჩანაწერების შინაარსის გამო პარლამენტის საგამოძიებო კომისიის შექმნას მოითხოვენ. ამის შესახებ პარტიის ლიდერებმა, ალეკო ელისაშვილმა და ლევან იოსელიანმა საგანგებო ბრიფინგი გამართეს.
"ლოგიკური იქნებოდა, პირველი წუთიდან თვითონ პროკურატურას დაეწყო გამოძიება და ასე ხდება ნებისმიერ სამართლებრივ სახელმწიფოში, როდესაც ასეთი ტიპის ჩანაწერები ხდება საჯარო. ამ ჩანაწერიდან იკვეთება შესაძლო სისხლისსამართლებრივი დანაშაული მთელი რიგი საჯარო პირების მიერ.
ეს რომ არ ხდება, სწორედ ეს არის მიზეზი, რომ ჩვენ ვითხოვთ, უკვე პარლამენტში შეიქმნას საგამოძიებო კომისია. პარლამენტს აქვს, რეალურად, ბერკეტი, დაიბაროს ყველა ის ადამიანი, ვინც არის ამ ჩანაწერებში მონაწილე", - განაცხადა იოსელიანმა.