ჩრდილო ატლანტიკური ალიანსის გენერალური მდივნის, იენს სტოლტენბერგის თქმით, ნატო-ს კარი საქართველოსა და უკრაინისთვის ღია რჩება. როგორც მან ევროპის კოლეჯში სიტყვით გამოსვლისას თქვა, ბუქარესტის სამიტზე მიიღეს გადაწყვეტილება, რომ უკრაინა და საქართველო ნატოს წევრები გახდებიან, მაგრამ იმისთვის, რომ წევრები გახდნენ, სტანდარტები უნდა დააკმაყოფილონ.

ჩემი გზავნილი ორივე ქვეყნისთვის არის ის, რომ ისინი ორიენტირებულები უნდა იყვნენ რეფორმებზე, ინსტიტუტების რეფორმირებასა და მოდერნიზებაზე, დემოკრატიული ინსტიტუტების გაძლიერებაზე, კორუფციასთან ბრძოლაზე. ჩვენ ამ რეფორმების გატარების მცდელობაში მათ ვეხმარებით. ეს არის ნებისმიერი სუვერენული სახელმწიფოს უფლება, გადაწყვიტოს, უნდა იყოს ნატოს წევრი თუ არა. თუკი ქვეყანას სურს, ნატოს წევრი გახდეს, როგორც ეს საქართველოსა და უკრაინის შემთხვევაშია, ეს ნატოს წევრების და ამ ქვეყნების გადასაწყვეტია და არავისი სხვისი. რუსეთი ვერ უარყოფს სუვერენული სახელმწიფოს უფლებას გახდეს ნატოს წევრი, - ამბობს სტოლტენბერგი.