ახლა უნდათ გაყალბებული არჩევნების გადაყალბება. ამას ქართველი ხალხი არ შეარჩენს, აქ ლუკაშენკო არ გამოუვა ივანიშვილს,- ამის შესახებ „ნაციონალური მოძრაობის“ ერთ-ერთმა ლიდერმა გიორგი ბარამიძემ ისნის მე-5 საოლქო საარჩევნო კომისიასთან მიმდინარე აქციაზე ჟურნალისტებს განუცხადა.
მისივე თქმით, გაუგებარია, რა არის დასამალი ხმების დაზუსტების პროცესში. "გაუგებარია, დათვლის პროცესია დასამალი? რომელი კომპონენტია, რაც სახელმწიფო საიდუმლოებას წარმოადგენს? იციან, რომ გაყალბებულია და ახლა უნდათ გაყალბებულის კიდევ უფრო ლამაზად გადაყალბება. ამით არიან დაკავებულები ეს პუტინის მონები, პუტინის სპეცოპერაციით მოთრეული ხალხი. ამას ქართველი ხალხი არ შეარჩენს, აქ ლუკაშენკო არ გამოუვა ივანიშვილს. ეს არ იცის, ქართველ ხალხს არ იცნობს და ძალიან მწარედ ინანებს თუ გონს დროზე არ მოეგება და არ დაჰყვება ქართველი ხალხის ნებას, რომ ის გადავიდეს ოპოზიციაში და მთელი პროდასავლური ოპოზიცია მოვა ახალ კოალიციურ ხელისუფლებაში. ამას წყალი არ გაუვა, იმიტომ რომ დარჩება მარტო და მერე ბევრად უფრო მწარედ დამარცხდება“, -აღნიშნა ბარამიძემ.