ყოველგვარი ჩარევა მიუღებელია - ღარიბაშვილი მოსამართლეებს სრულ მხარდაჭერას უცხადებს
პრემიერმინისტრმა, ირაკლი ღარიბაშვილმა ამერიკის მიერ მოსამართლეების სანქცირებაზე პირველი კომენტარი გააკეთა და მოსამართლეებს სრული მხარდაჭერა გამოუცხადა. მისი თქმით, ყოველგვარი ჩარევა სასამართლოს მუშაობაში მიუღებელია. ღარიბაშვილმა თქვა, რომ "ჩვენ მაქსიმუმს გავაკეთებთ იმისთვის, რომ დავიცვათ სასამართლოს დამოუკიდებლობა, სასამართლოს თავისუფლება ყოველგვარი ჩარევებისგან, ყოველგვარი ზეწოლისგან, ეს არის ჩვენი გაცხადებული პოლიტიკა".
"ჩემი მთავარი გზავნილი იყო და არის შემდეგი, მე როგორც მთავრობის მეთაური და მმართველი გუნდის, პარტიის წარმომადგენელი სრულ მხარდაჭერას ვუცხადებ ყველა მოსამართლეს. სასამართლო ჩვენი მმართველობის დროს გახდა დამოუკიდებელი, თავისუფალი ყოველგვარი ჩარევებისგან, როგორც შიდა ჩარევებისგან, ასევე სხვა ქვეყნების მხრიდან ჩარევებისგან. რა თქმა უნდა, მიუღებელია ყოველგვარი ჩარევა, ან რაიმე გავლენის მოხდენა მოსამართლეებზე,ე ს არის აბსოლუტურად მიუღებელი ჩემთვის, ჩვენთვის ყველასთვის, მით უმეტეს სუვერენული ქვეყნის სუვერენულ სასამართლოზე და მოსამართლეებზე", - თქვა ღარიბაშვილმა.მისი თქმით, დღეს სასამართლო თავისუფალი და დამოუკიდებელია და ამისთვის ბევრი რეფორმა გაატარეს.