რუსეთი და ოკუპირებული აფხაზეთის ე.წ. თავდაცვის უწყება თანამშრომლობის გეგმაში ცვლილებებს შეიტანენ, რადგან კორონავირუსის გამო ღონისძიებათა ნაწილი არ ჩატარდა. ამის შესახებ რუსეთის თავდაცვის მინისტრმა სერგეი შოიგუმ ე.წ. აფხაზ კოლეგასთან ვლადიმერ ანუასთან დღევანდელ შეხვედრაზე განაცხადა. მისი თქმით, რუსული მხარე მომავალშიც აპირებს განავითაროს ნორმატიული სამართლებრივი ბაზა თავდაცვის სფეროში, გაზარდოს სამხედრო და სამხედრო - ტექნიკური თანამშრომლობა, გადაიყვანოს ორმხრივი შეთანხმებები პრაქტიკულ სიბრტყეში. შოიგუს თქმით, დარწმუნებულია, რომ ორმხრივი სამხედრო პარტნიორობა ხელს შეუწყობს მშვიდობასა და აფხაზეთის განვითარებას. მისივე თქმით, მოხარულია, რომ „აფხაზი მეგობრები საერთაშორისო სამხედრო თამაშებში მონაწილეობენ“ და მათ წარმატება უსურვა. ოკუპირებული აფხაზეთის ე.წ. შეიარაღებული ძალები პირველად მონაწილეობენ სამხედრო საერთაშორისო თამაშებში, რომლებიც რუსეთში იმართება.