აფხაზეთის ომის ვეტერანთა ორგანიზაცია „არუაა“ მოითხოვს განმარტებას ოკუპირებულ რეგიონში „საქართველოს პატრიოტთა ალიანსის“ ლიდერების, დავით თარხან-მოურავის და ირმა ინაშვილის ჩასვლის გამო.
„არუაა“-ს ინფორმაციით, ამ პირებმა 18 აგვისტოს საიდუმლო შეხვედრა გამართეს აფხაზეთის „პრეზიდენტის“ თანაშემწე ლაშა საქანიასთან. „არუაა“ აფხაზეთის დე ფაქტო პარლამენტს თხოვს, შესაბამის სტრუქტურებს ოფიციალურად მიმართოს შეხვედრის მიზეზების დასადგენად და ამ საკითხზე მოსმენა გამართოს.
გარდა ამისა, “არუაა“-ს უმაღლესი საბჭოს წევრმა, გალის დე ფაქტო ადმინისტრაციის ყოფილმა ხელმძღვანელმა, თემურ ნადარიამ ლაშა საქანიას და ე.წ. უშიშროების კომიტეტს მიმართა, დაადასტურონ, ან უარყონ „პატრიოტთა ალიანსის“ წარმომადგენლებთან შეხვედრა.
ინფორმაცია ირმა ინაშვილის და დავით თარხან-მოურავის აფხაზეთში ჩასვლის შესახებ 20 აგვისტოს გაავრცელა „მთავარმა არხმა“. ტელეკომპანიას არ უთქვამს, ვის შეხვდნენ "პატრიოტთა ალიანსის" წევრები.
თავად „პატრიოტთა ალიანსის“ ლიდერები ამ თემაზე საჯაროდ ჯერჯერობით არ საუბრობენ. არსებული ინფორმაციით, ოკუპირებული რეგიონიდან დაბრუნებული ინაშვილი და თარხან-მოურავი ზუგდიდის მუნიციპალიტეტის სოფელ განმუხურში არსებულ საკარანტინე სივრცეში გადაიყვანეს.