ნოდარ მელაძე სუს-ში დაიბარეს. საქმე ეხება გიორგი გაბუნიას შეკვეთილი მკვლელობის მომზადების საქმეზე მიმდინარე გამოძიებას. როგორც მელაძემ განაცხადა, საგამოძიებო უწყებაში ის ხვალ დილით, 11 საათზე უნდა მივიდეს.
ნოდარ მელაძის ინფორმაციით, სუს-ი ვასამბეკ ბოკოვთან დაკავშირებით, "ტვ პირველზე" გასული რეპორტაჟის შემდეგ დაინტერესდა და გამომძიებლები მას პირადად დაუკავშირდნენ.
ნოდარ მელაძის გარდა, საგამოძიებო უწყებაში დაბარებულია ჟურნალისტი მაკა ჩიხლაძეც.
შეგახსენებთ, რომ ვასამბეკ ბოკოვი შეკვეთილი მკვლელობის მომზადების საქმეზეა დაკავებული. უსაფრთხოების სამსახური ოფიციალურ განცხადებაში გიორგი გაბუნიას სახელსა და გვარს არ ასახელებს, თუმცა მიმდინარე გამოძიების ფარგლებში უკვე დაიკითხნენ "მთავარი არხის" გენერალური დირექტორი ნიკა გვარამია და გიორგი გაბუნია.