ესპანეთი 22 ივნისიდან შენგენის წევრი ქვეყნებისთვის საზღვარს გახსნის, გარდა პორტუგალიისა, რომელთანაც საზღვრის გახსნა 1-ელი ივლისიდან იგეგმება.
ადგილობრივი მედიის ინფორმაციით, ამის შესახებ მთავრობის მეთაურმა პედრო სანჩესმა ავტონომიების ხელმძღვანელებთან ონლაინ მოლაპარაკებების დროს განაცხადა. გამოცემა „პაისის“ ინფორმაციით, საზღვრების გახსნა 21 ივნისს მოხდება. მოსალოდნელია, რომ საზღვრების გახსნის ოფიციალურ ვადებს პრემიერ-მინისტრი დღეს დაგეგმილ პრესკონფერენციაზე განაცხადებს. სააგენტო „Efe“-ს ინფორმაციით, 1-ელ ივლისს გაიმართება ესპანეთ-პორტუგალიის საზღვრის გახსნის ოფიციალური ცერემონია, რომელსაც მეფე ფელიპე მეექვსე, პორტუგალიის პრემიერ-მინისტრი და პრეზიდენტი დაესწრებიან.
მიმდინარე კვირას ევროკავშირის, შენგენის ზონის და შენგენის ზონაში ასოცირებულ ქვეყნებს ევროკომისიამ რეკომენდაცია მისცა, 15 ივნისიდან მოხსნან შიდა სასაზღვრო კონტროლი.