10 აგვისტოს ღამით შეჩერებული იყო მოსკოვის აეროპორტების, "დომოდედოვოსა" და "ვნუკოვოს" მუშაობა. სამთავრობო მედია "რია" ავრცელებს ინფორმაციას, რომ აეროპორტები ამჟამად ჩვეულ რეჟიმში მუშაობენ. 
"ვნუკოვოს" აეროპორტის პრესსამსახური აცხადებს, რომ დროებითი შეზღუდვები მათგან დამოუკიდებელი მიზეზების გამო შემოიღეს დილის 02:43 საათიდან. პრესსამსახური ამბობს ფრენების ნაწილი სხვაგან გადამისამართდა.
"დომოდედოვოს" აეროპორტში განაცხადეს, რომ დროებითი შეზღუდვები "ფრენის უსაფრთხოების დამატებითი ზომების უზრუნველსაყოფად" დაწესდა. 
მანამდე რუსეთის თავდაცვის სამინისტრო ამტკიცებდა, რომ ღამით, სევასტოპოლის, კალუგის ოლქის მალოიაროსლავსკის რაიონში და მოსკოვის ოლქის ოდინცოვოს რაიონში, "ჩაიშალა კიევის მცდელობები დრონებით ტერორისტული თავდასხმების განხორციელებაზე". უწყება ამბობს, რომ მსხვერპლი და ნგრევა არ ყოფილა.  
მოსკოვის მერმა, სერგეი სობიანინმა განაცხადა, რომ დედაქალაქისკენ მიმავალი ორი დრონი ჩამოაგდეს, ერთი კალუგის რეგიონში, მეორე ცენტრალური ავტომაგისტრალის რაიონში.