ისევე როგორც უკრაინაში, ქართველმა ხალხმა განიცადა რუსეთის მიერ მეზობლებზე დომინირების სურვილი - ბლინკენი
აგვისტოს ომის 15 წლისთავთან დაკავშირებით, აშშ-ის სახელმწიფო დეპარტამენტი სახელმწიფო მდივნის, ენტონი ბლინკენის განცხადებას ავრცელებს. განცხადებაში აღნიშნულია, რომ 15 წელია გასული რუსეთის საქართველოში შეჭრიდან, რომლის შედეგადაც ქვეყნის ტერიტორიების 20% ოკუპირებულია და რუსეთი დღემდე არ ასრულებს 2008 წელს ხელმოწერილი 6-პუნქტიანი შეთანხმებას:
"თხუთმეტი წლის წინ რუსეთი შემოიჭრა საქართველოს სუვერენულ სახელმწიფოში და მისი ტერიტორიის 20 პროცენტი დაიკავა. შეერთებული შტატები მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში. კონფლიქტის შედეგად დაზარალებული მოსახლეობის ცხოვრება სამუდამოდ შეიცვალა რუსეთის ქმედებებით. ღრმა პატივისცემითა და გულწრფელი თანაგრძნობით ვიხსენებთ დაღუპულებს, დაშავებულებს და დევნილებს.ომის 15 წლისთავს აშშ-ის სახელმწიფო მდივანი ტვიტერითაც გამოეხმაურა.
რუსეთის ქმედებები ოკუპაციის დროს, მათ შორის კრემლის მავნე დეზინფორმაციული კამპანია, ე.წ. „ბორდერიზაცია“ და მასობრივი გადაადგილება ჯერ კიდევ უთქმელ სირთულეებს იწვევს. ისევე როგორც უკრაინაში, ქართველმა ხალხმა განიცადა რუსეთის მიერ საერთაშორისო სამართლის უპატივცემულობა და მეზობლებზე დომინირების სურვილი.
შეერთებულ შტატებს გადაწყვეტილი აქვს, დააკისროს რუსეთს პასუხისმგებლობა 2008 წლის ექვსპუნქტიანი ცეცხლის შეწყვეტის შეთანხმების საფუძველზე, გაიყვანოს თავისი ძალები კონფლიქტამდე პოზიციებზე და დაუბრკოლებლად დაუშვას ჰუმანიტარული დახმარების მიწოდება. რუსეთმა ასევე უნდა გააუქმოს საქართველოს რეგიონების, აფხაზეთისა და სამხრეთ ოსეთის ე.წ. დამოუკიდებლობის აღიარება. ეს ქმედებები აუცილებელია იმისთვის, რომ ასიათასობით იძულებით გადაადგილებულმა პირმა შეძლოს უსაფრთხოდ დაბრუნდეს საკუთარ სახლებში და იცხოვროს ღირსეულად.
თხუთმეტი წლის შემდეგ, შეერთებული შტატები ურყევი რჩება ქართველი ხალხის მხარდაჭერაში და მის ევროატლანტიკური ინტეგრაციისკენ დაუძლეველ მისწრაფებაში, რადგან ისინი იცავენ თავიანთ სუვერენიტეტსა და ტერიტორიულ მთლიანობას და ესწრაფვიან კონფლიქტის მშვიდობიანი გადაწყვეტას." ნათქვამია ბლინკენის განცხადებაში.