პოლონეთის საგარეო საქმეთა მინისტრის, ზბიგნევ რაუს განცხადებით, იმ შემთხვევაში თუ რუსეთი ზაპოროჟიეს ატომურ ელექტროსადგურს თავს დაესხმება, ვარშავის პასუხი "ადეკვატური" იქნება.   
"ეს სრულიად ახალი სიტუაცია იქნება. შესაბამისად, ჩვენ პასუხს გავცემთ ადეკვატურად", - თქვა მინისტრმა. 
მისივე სიტყვებით, ამგვარი თავდასხმა NATO-ს ტერიტორიის მნიშვნელოვან ნაწილს შეეხება, ამიტომ ეს ქმედება შესაბამის პასუხსაც მოითხოვს - "ნუ ელით, რომ ზუსტად გეტყვით, რა იქნება ეს პასუხი".
შეგახსენებთ, რომ უკრაინული მხარე რუსეთის მიერ ზაპოროჟიეს ატომური ელექტროსადგურის შესაძლო აფეთქების შესახებ უკვე დიდი ხანია საუბრობს. ამასთან დაკავშირებით განცხადება უკრაინის პრეზიდენტმა, ვოლოდიმირ ზელენსკიმაც გააკეთა. როგორც პრეზიდენტმა თქვა, ოკუპანტებმა ზაპოროჟიეს ატომური სადგურის სახურავებზე ასაფეთქებლის მსგავსი ობიექტები განათავსეს.
რუსეთი ბრალდებას ტრადიციულად უარყოფს. კრემლის სპიკერის, დიმიტრი პესკოვის თქმით, ევროპის უდიდეს ატომურ სადგურზე ვითარება "საკმაოდ დაძაბულია" და "კიევის რეჟიმის მიერ დივერსიის" პოტენციალი "მაღალია", რასაც შესაძლოა "კატასტროფული შედეგები მოჰყვეს".