უკრაინის პრეზიდენტის, ვოლოდიმირ ზელენსკის თქმით, ყველა, ვინც რუსეთს ეხმარება, პასუხის მიიღებს უკრაინისა და მთელი მსოფლიოს სახელით. გავრცელებულ ვიდეომიმართვაში ზელენსკიმ სანქციების იმ უახლეს პაკეტზე ისაუბრა, რომელშიც ქართული ავიაკომპანია Georgian Airways და მისი დამფუძნებელი, თამაზ გაიაშვილი მოხვდა.

"დღეს გამოიცა სანქციების კიდევ ერთი პაკეტი იმ პირების წინააღმდეგ, ვინც რუსეთს ამ ტერორისტული ომის წარმოებაში ეხმარებოდნენ. სანქციები მივიღეთ 400 კომპანიისა და 200 ინდივიდუალური პირის წინააღმდეგ, მათ შორის არ არიან მხოლოდ რუსეთის მოქალაქეები. ყველა, ვინც ეხმარება აგრესორს აუცილებლად მიიღებს პასუხს უკრაინისა და მთელი მსოფლიოს სახელით", - თქვა ვოლოდიმირ ზელენსკიმ.

შეგახსენებთ, გუშინ 1 ივლისს უკრაინამ Georgian Airways-სა და თამაზ გაიაშვილს სანქციები დაუწესა, რაც ავიაკომპანიის მხრიდან მოსკოვთან ფრენების აღდგენას უკავშირდება.