რუსეთის მხარეს მებრძოლი ეთნიკურად ქართველი ნოდარ ბახტურიძე, რომელიც უკრაინაში ტყვედ ჩავარდა, ამბობს, რომ სურს საქართველოს ან „ნებისმიერ დემოკრატიულ ქვეყანას“ პოლიტიკური თავშესაფარი სთხოვოს.
ნოდარ ბახტურიძეს უკრაინული ტელეარხი FREEДOM-ი ესაუბრა. ვიდეოში კაცი ამბობს, რომ საუბარს ნებაყოფლობით დასთანხმდა, თუმცა უცნობია, რა ვითარებაში ჩაიწერა ინტერვიუ.
ბახტურიძე ირწმუნება, რომ რუსეთის კოლონიაში სასჯელს უკანონოდ იხდიდა, ის რუსეთის თავდაცვის სამინისტროსთან გაფორმებული კონტრაქტით კერძო სამხედრო კომპანია „ვაგნერში“ მოხვდა. ბახტურიძე ჰყვება, რომ უკრაინელებს ტყვედ საბრძოლო მოქმედებების ზონაში მოხვედრიდან მეორე დღეს ჩაბარდა.
„თავიდანვე მქონდა ეს იდეა: ჩავბარებოდი და ჩემს სამშობლოში, საქართველოში თავშესაფარი მომეთხოვა“, - აღნიშნავს ბახტურიძე.
ის ამბობს, რომ დიდი ხანია თვალს ადევნებს უკრაინაში მიმდინარე მოვლენებს, რომ გულშემატკივრობდა მის დამოუკიდებლობას და ტერიტორიულ მთლიანობას, რადგან მისი სამშობლო, „საქართველო იგივე უბედურებაშია“. ამასთან, ის რუსეთში ცხოვრობდა 30 წელი.
რადიო თავისუფლება ადრეც წერდა ნოდარ ბახტურიძის შესახებ. მისი ტყვედ ჩავარდნიდან მალევე გადაღებულ ვიდეოში ის ჰყვებოდა, რომ შორეული აღმოსავლეთის ქალაქ ტინდადანაა.
ზოგი ბლოგერი წერს, რომ ბახტურიძე აფხაზეთის ომშიც მონაწილეობდა, დაიბადა და გაიზარდა კახეთში. უცნობია, აქვს თუ არა მას საქართველოს მოქალაქეობა.