NATO-ს გენერალური მდივნის, იენს სტოლტენბერგის თქმით, ნატო არ გაუკეთებს ოფიციალურ მიწვევას უკრაინას, შეუერთდეს სამხედრო ალიანსს ივლისში ლიტვის დედაქალაქ ვილნიუსში გამართული მაღალი დროს.

"სამიტისთვის მზადების პროცესში ჩვენ არ განვიხილავთ [უკრაინისთვის] ოფიციალური მიწვევის გაცემას. ჩვენ განვიხილავთ, როგორ დავუახლოოთ უფრო მეტად უკრაინა NATO-ს", - უთხრა სტოლტენბერგმა ჟურნალისტებს ბერლინში გერმანიის კანცლერ ოლაფ შოლცთან ერთად გამართულ ბრიფინგზე.

როგორც სტოლტენბერგმა აღნიშნა, უკრაინის NATO-ში გაწევრიანებასთან დაკავშირებით კონსულტაციები მიმდინარეობს, თუმცა თქვა, რომ ის წინასწარ შედეგებზე ვერ ისაუბრებს.

"რაც შემიძლია ვთქვა ისაა, რომ მოკავშირეები რეალურად უკვე ბევრ რამეზე თანხმდებიან. ჩვენ ვთანხმდებით იმაზე, რაც 2008 წელს განვაცხადეთ, რომ უკრაინა გახდება ალიანსის წევრი. ჩვენ ასევე ვთანხმდებით, რომ არა რუსეთის, არამედ უკრაინისა და NATO-ს მოკავშირეების გადასაწყვეტია, როდის იქნება შესაფერისი დრო უკრაინის ალიანსში მიწვევისთვის", - თქვა სტოლტენბერგმა.

ვილნიუსში NATO-ს სამიტი 15 და 16 ივლისს გაიმართება.