საქართველოს პრემიერმინისტრს ვერავინ ვერსად ვერ დაიბარებს - აცხადებს თავმჯდომარე კობახიძე ღარიბაშვილისა და შოლცის შეხვედრასთან დაკავშირებით, სადაც გერმანიის კანცლერმა "ოცნების" პრემიერს რეფორმების განსახორციელებლად კონკრეტული ვადა დაუსახელა, თუმცა კობახიძე ამასაც უარყოფს და ამტკიცებს, რომ ივნისის ბოლომდე 12 რეკომენდაციის ყველა პუნქტი შესრულდება:  

"თავის დროზე, 2008 წელს იბარებდნენ სააკაშვილს და რაღაცეებს ავალებდნენ. ასეთი რაღაცეები ხდებოდა მაშინ, მაგრამ დღეს საქართველო არის სუვერენული სახელმწიფო, შესაბამისად, დღეს განსხვავებით წინა ხელისუფლებისგან, საქართველოს პრემიერმინისტრს ვერავინ ვერსად ვერ დაიბარებს და ვერავინ ვერავითარ წამზომს ვერ ჩაურთავს." აცხადებს კობახიძე.

შოლცმა საქართველოს მთავრობას მოუწოდა, გადადგას რეფორმისთვის საჭირო ნაბიჯები უახლოეს კვირებში. ამის თაობაზე განცხადება გერმანიის კანცლერის ოფისმა გუშინ, შეხვედრის დასრულების შემდეგ გაავრცელა.
შეგახსენებთ, "მთავარის" ინფორმაციით, ღარიბაშვილი სწორედ მისი ანტიდასავლური განცხადებებისა და რიტორიკის გამო დაიბარეს ბერლინში დახურულ შეხვედრაზე. თუმცა, "ოცნების" ხელისუფლება ამტკიცებს, რომ პრემიერი იქ მიიწვიეს. 
თავად ღარიბაშვილმა შეხვედრას, რომლის შემდეგაც პრესკონფერენციაც კი არ გამართულა, "ტვიტერზე", "შესანიშნავი მოლაპარაკებები" უწოდა