უკრაინამ რუსეთში აგენტების ქსელი შექმნა, რომლებიც მუშაობენ რუსული სამიზნეების წინააღმდეგ დივერსიული აქტების განსახორციელებლად და მათთვის დრონების მიწოდება დაიწყო, - ინფორმაციას CNN-ი აშშ-ის დაზვერვის მონაცემების შესახებ ინფორმირებულ წყაროებზე დაყრდნობით ავრცელებს.
აშშ-ის ოფიციალური პირები თვლიან, რომ მაისში, რუსეთში კრემლზე თავდასხმა სწორედ ამ პრო-უკრაინულმა აგენტებმა არა უკრაინის, არამედ რუსეთის ტერიტორიიდან გაშვებული დრონებით განახორციელეს.
ამასთან, გაურკვეველია, განხორციელდა თუ არა რუსეთის ტერიტორიიდან და აღნიშნული პროუკრაინული ქსელის მიერ ბოლო დღეების სხვა თავდასხმები - მათ შორის ერთი, რომლის სამიზნე მოსკოვის მახლობლად მდებარე საცხოვრებელი უბნები იყო და მეორე, რომლის სამიზნე ნავთობგადამამუშავებელი ქარხნები იყო.
აშშ-ის ოფიციალური პირები თვლიან, რომ უკრაინამ დივერსიული უჯრედები რუსეთში შექმნა და ისინი შედგება პრო-უკრაინულად განწყობილი ადამიანებისგან, რომლებიც კარგად გაწვრთნილი არიან ამ ტიპის ომში. ვარაუდობენ, რომ უკრაინამ მათ უკრაინული წარმოების დრონები მიაწოდა. ორმა ამერიკელმა ოფიციალურმა პირმა CNN-ს განუცხადა, რომ არ არსებობს რაიმე მტკიცებულება იმისა, რომ რომელიმე თავდასხმა აშშ-ის მიერ მიწოდებული დრონების გამოყენებით განხორციელდა.
ოფიციალური პირები დანამდვილებით ვერ საუბრობენ, თუ როგორ მოახერხა უკრაინამ დრონების მტრის ზურგში გადატანა, მაგრამ ორმა წყარომ CNN-ს განუცხადა, რომ დადგენილია კონტრაბანდის მარშრუტები, რომლებიც შეიძლება გამოყენებულ იქნას რუსეთში დრონების ან დრონების ასაწყობად საჭირო კომპონენტების გასაგზავნად.