"ყველა, ვინც ცდილობს, ეს დღე ქიშპში, ერთმანეთის ბრალდებაში გაატაროს, ამ დღეს გვართმევს", – ასე შეაფასა საქართველოს პარლამენტის თავმჯდომარე შალვა პაპუაშვილმა 26 მაისის ღონისძიებაზე პრეზიდენტ სალომე ზურაბიშვილის კრიტიკული გამოსვლა.
როგორც შალვა პაპუაშვილმა ჟურნალისტებს განუცხადა, საქართველოს დამოუკიდებლობის დღეს კამათი, დისკუსია და ურთიერთბრალდებები არ უნდა ისმოდეს.
„ვფიქრობ, დამოუკიდებლობის დღე არის დღე, როდესაც არ უნდა იყოს კამათი, დისკუსია, ურთიერთბრალდებები. პირადად, ამ სულისკვეთებაში დავრჩები. მთელ საქართველოს ვუსურვებ, რომ ეს დღე პოზიტიურად გაატაროს, ვინაიდან ეს დღე ჩვენია. ყველა, ვინც ცდილობს, რომ ეს დღე გაატაროს ქიშპში, ერთმანეთის ბრალდებაში და ა.შ. გვართმევს ამ დღეს. ქართულ საზოგადოებას ვუსურვებ, რომ ეს დღე მიიღოს, როგორც მისი დღე და ბოლომდე იზეიმოს“, - განაცხადა პაპუაშვილმა.
საქართველოს პრეზიდენტმა სალომე ზურაბიშვილმა დამოუკიდებლობის დღისადმი მიძღვნილ საზეიმო ცერემონიალზე სიტყვით გამოსვლისას გააკრიტიკა ხელისუფლება, რომელიც "საკუთარი მოქალაქეების პატივზე და ღირსებაზე არ ფიქრობს".