"დარწმუნებულები უნდა ვიყოთ, რომ ბოროტება დამარცხდება. უნდა დავიჯეროთ... სამყარო ჩვენთანაა" | ზელენსკი
"დარწმუნებულები უნდა ვიყოთ, რომ ბოროტება დამარცხდება. უნდა დავიჯეროთ... სამყარო ჩვენთანაა", - ამის შესახებ უკრაინის პრეზიდენტმა ვოლოდიმირ ზელენსკიმ ტრადიციულ, საღამოს ვიდეომიმართვაში ისაუბრა.
ამ ღამით რუსებმა ზაპოროჟიე S-300 რაკეტებით დაბომბეს. დაარტყეს საცხოვრებელ კორპუსს, სადაც 3 ადამიანი იყო. კაცი, ქალი და ბავშვი - გოგოს ირინა ერქვა, ის წელს 11 წლის გახდებოდა. ის დაიღუპა, მამამისიც. ვუსამძიმრებ... ქალი ახლა მძიმე მდგომარეობაშია, საავადმყოფოშია და სამედიცინო დახმარებას უტარებენ.
ასე ატარებს ტერორისტული სახელმწიფო ბზობის კვირას. აი, როგორ იგდებს რუსეთი თავს კიდევ უფრო დიდ იზოლაციაში მსოფლიოსა და კაცობრიობისგან.
ყოველი ნათელი ქრისტიანული დღესასწაული გვასწავლის, რომ შეიძლება არ ვიცოდეთ როგორ, მაგრამ დარწმუნებულები უნდა ვიყოთ, რომ ბოროტება დამარცხდება. უნდა დავიჯეროთ. და ჩვენ გვჯერა. ჩვენ უნდა მივუახლოვდეთ ბოროტების დამარცხებას. ვუახლოვდებით. სამყარო ჩვენთანაა. ყოველთვიურად, ყოველ კვირას გვემატება თანადგომა, იზრდება მხარდამჭერთა წრე, ვინც მხარს უჭერს ჩვენს გამბედაობასა და ცხოვრების რწმენას.
დიდება ყველა უკრაინელ გმირს! ყველას, ვინც ახლა ბრძოლაშია! ყველას, ვინც ამჟამად საბრძოლო მისიებსა და დავალებებს ასრულებს!
მარადიული და ნათელი ხსოვნა ყველას, ვინც სიცოცხლე გაწირა უკრაინისა და უკრაინელების სიცოცხლის დასაცავად!
დაე, მომავალი წლის ბზობის კვირამ მშვიდობით ჩაიაროს მთელი ჩვენი ხალხისთვის! დაე, შეისმინოს გულწრფელი ლოცვა მშვიდობისთვის ყველამ, ვინც აღდგომას დღეს აღნიშნავს! დიდება უკრაინას!, - განაცხადა ზელენსკიმ.