აშშ-ის ელჩი საქართველოში კელი დეგნანი პრემიერ-მინისტრს, ირაკლი ღარიბაშვილს, პასუხობს სახელმწიფო დეპარტამენტის ბოლო ანგარიშზე. პრემიერმა თქვა, რომ ანგარიში "არაობიექტურ" და "უსამართლო" დასკვნებს ეყრდნობა.
ელჩის განმარტებით, აშშ-ის სახელმწიფო დეპარტამენტი კონკრეტულ საკითხებზეა კონცენტრირებული და არა პოლიტიკურ პარტიებზე და ანგარიშში მოხვედრილი ინფორმაცია რამდენჯერმეა გადამოწმებული. ამის შესახებ კელი დეგნანმა ახალციხეში, "ამერიკული თაროს" გახსნაზე ისაუბრა ჟურნალისტებთან:
"აშშ-ის სახელმწიფო დეპარტამენტის ანგარიში ათწლეულებია მზადდება და იგი კონცენტრირდება საკითხებზე და არა პოლიტიკურ პარტიებზე თუ ინდივიდებზე. იგი ეყრდნობა სანდო წყაროების სპექტრს, რომელიც შემოწმებული და შემდეგ კიდევ გადამოწმებულია.
ეს ანგარიშები ძალიან კარგი საშუალება და რესურსია, ქრონოლოგიურად დავინახოთ არა მხოლოდ რა საჭიროებები არსებობს და სად არის ხარვეზი, არამედ ის, თუ წლების განმავლობაში რა შეიცვალა, რა გაუმჯობესდა. ის ძალიან კარგი რესურსია, რომ ხელი შეუწყოს ძალისხმევას დემოკრატიის უკეთესი განვითარებისთვის. იმედია, ეს ასე იქნება დანახული".
საქართველოს პრემიერ-მინისტრმა ირაკლი ღარიბაშვილმა "მოგონილი" და "სპეკულაციური" უწოდა იმ ფაქტებს, რაც აშშ-ის სახელმწიფო დეპარტამენტის 2022 წლის ანგარიშში მოხვდა საქართველოს შესახებ.
21 მარტს პრემიერმა ჟურნალისტებთან აღნიშნა, რომ სახელმწიფო დეპარტამენტი "ელიტური არასამთავრობო ორგანიზაციების უსამართლო და სუბიექტურ დასკვნებს" ეყრდნობა:
"ძალიან მოკლედ გავეცანი ანგარიშს, ძირითად აქცენტებს. სამწუხაროა ის ფაქტი, რომ იგი ეყრდნობა ძირითადად იმ ინფორმაციას, რაც მიწოდებული იყო - არაობიექტურ, მიკერძოებულ და უსამართლო დასკვნებს, რაც მომზადდა ე.წ. ელიტური არასამთავრობო ორგანიზაციების მიერ.
ნახსენები ფაქტები არ შეესაბამება სიმართლეს, ესაა სპეკულაციები და ცალკეული პოლიტიკურად ანგაჟირებული, მიკერძოებული ადამიანების მიერ მოგონილ ინფორმაციებზე დაყრდნობილია. ესა არაა ჩვენთვის საინტერესო", - თქვა ღარიბაშვილმა.