საქართველოს საგარეო საქმეთა მინისტრის, დავით ზალკალიანის განცხადებით, კოვიდ 19-ის გავრცელების პირობებში სახელმწიფოს ხელშეწყობით საქართველოში დაბრუნებული მოქალაქეების რაოდენობამ დღევანდელი მონაცემებით 10 000-ს გადააჭარბა. მინისტრის თქმით, მათ შორისაა განსაკუთრებული საჭიროების მქონე 2828 მოქალაქე. საგარეო საქმეთა მინისტრმა ბრიფინგზე განაცხადა, რომ საკოორდინაციო საბჭოს მიერ განსაზღვრული გეგმის თანახმად, ავიაკომპანია „საქართველოს ავიახაზებთან“ თანამშრომლობით სულ 61 სპეციალური ავიარეისი განხორციელდა.
მოქალაქეთა ეტაპობრივი დაბრუნება, დავით ზალკალიანის თქმით, მომავალშიც გაგრძელდება, თუმცა რეგულარული ფრენების აღდგენის შემთხვევაში, შესაძლოა ისინი სამშობლოში რეგულარული რეისებით დაბრუნდნენ.
ამ დროისათვის, საგარეო საქმეთა მინისტრის თანახმად, სპეციალური ავიარეისების გრაფიკი 22 მარტის ჩათვლითაა გაწერილი.