რთული ღამე იყო. მასიური სარაკეტო შეტევა მთელი ქვეყნის მასშტაბით. კიევის, კიროვოგრადის, დნიპროს, ოდესის, ხარკოვის, ზაპოროჟიეს, ლვოვის, ივანო-ფრანკოვსკის, ჟიტომირის, ვინიცის ოლქები. თავდასხმები კრიტიკულ ინფრასტრუქტურასა და საცხოვრებელ შენობებზე, - ამის შესახებ უკრაინის პრეზიდენტი, ვოლოდიმირ ზელენსკი „ფეისბუქში“ წერს.
მისი თქმით, სამწუხაროდ, თავდასხმის შედეგად, არიან დაღუპულები და დაშავებულები.
„მტერმა 81 რაკეტა გაისროლა უკრაინელების დაშინების მიზნით. ოკუპანტებს მხოლოდ მშვიდობიანი მოსახლეობის დატერორება შეუძლიათ. ეს არის ყველაფერი, რაც მათ შეუძლიათ, მაგრამ ეს მათ ვერ დაეხმარება. ვერ აიცილებენ პასუხისმგებლობას ყველაფერზე, რაც გააკეთეს“, - წერს ზელენსკი.
შეგახსენებთ, წუხელ, რუსულმა ძალებმა უკრაინის წინააღმდეგ დრონებისა და რაკეტების გამოყენებით კიდევ ერთი მასიური თავდასხმა განახორციელეს.