"რუსულ მხარეს არ მოუმართავს ქართული მხარისათვის და შესაბამისად, ჩვენთვის უცნობია რა მოლაპარაკებაზე საუბრობს სოჭის პორტის ადმინისტრაცია", - ასე ეხმაურება საქართველოს საზღვაო ტრანსპორტის სააგენტო, სოჭის პორტის ადმინისტრაციის დირექტორის, იური ვლადიმიროვის განცხადებას, რომ ისინი "მოლაპარაკებებს აწარმოებდნენ საქართველოში და აფხაზეთში სამგზავრო გემების ტრანსპორტირების დაწყებისთვის". 

"მედიაში გავრცელებულ ინფორმაციასთან დაკავშირებით, რომელიც შეეხება საქართველოსა და რუსეთის ფედერაციას შორის საზღვაო სამგზავრო მიმოსვლის დაწყებას, ვაცხადებთ, რომ საქართველოს რუსეთის საზღვაო ნავსადგურებთან საზღვაო სამგზავრო მიმოსვლა არ აქვს.
ამასთან, რუსულ მხარეს არ მოუმართავს ქართული მხარისათვის და შესაბამისად, ჩვენთვის უცნობია რა მოლაპარაკებაზე საუბრობს სოჭის პორტის ადმინისტრაცია", - ვკითხულობთ განცხადებაში. 

შეგახსენებთ, რომ სოჭის პორტის ადმინისტრაციის გენერალური დირექტორის ინტერვიუ რუსულ მედიაში გავრცელდა. იური ვლადიმიროვი აცხადებს, რომ საზღვაო გზით სამგზავრო გადაყვანის ახალ მარშრუტებზე ძალიან დიდი მოთხოვნაა, რის გამოც "საქართველოსთან და აფხაზეთთან სამგზავრო საზღვაო მიმოსვლის დაწყებისთვის მოლაპარაკებებს აწარმოებენ", თუმცა კონკრეტულად ვისთან, ამაზე ის არაფერს ამბობს.