დღეს, 17 ნოემბერს ჰააგის სისხლის სამართლის სასამართლო 2014 წელს რუსეთის მიერ, დონბასში ჩამოგდებული მალაიზიური ბოინგის საქმეზე განაჩენს აცხადებს. 
პროკურორები რუსეთის 3 და სეპარატისტების მხარეს მებრძოლი უკრაინის 1 მოქალაქისთვის სამუდამო პატიმრობას ითხოვენ. 
სამოქალაქო თვითმფრინავზე თავდასხმაში ბრალდებულები არიან სერგეი დუბინსკი, ოლეგ პულატოვი, ლეონიდ ხარჩენკო და FSB-ს ცნობილი თანამშრომელი იგორ სტრელკოვ-გირკინი.
სასამართლოს  დასკვნით, MH17 Boeing ჩამოაგდეს რუსული წარმოების რაკეტით, ბუკის რაკეტით, რომელიც გასროლილი იქნა პერვომაისკის რაიონიდან აღმოსავლეთ უკრაინაში, ქალაქ სნიჟნესთან (ეს ტერიტორია მაშინ თვითგამოცხადებული დონეცკის სახალხო რესპუბლიკის ძალების კონტროლის ქვეშ იყო).
სასამართლომ ასევე აღიარა, რომ თვითმფრინავის ჩამოგდების დროს ე.წ. დონეცკის "სახალხო რესპუბლიკაზე" კონტროლს ახორციელებდა რუსეთი.
 
სასამართლო მიიჩნევს, რომ მაისის შუა რიცხვებიდან რუსეთი ატარებდა წვრთნას თვითგამოცხადებული დონეცკის სახალხო რესპუბლიკის სამხედროებისთვის, აწვდიდა იარაღს და საკვებს, ახორციელებდა სერიოზულ გავლენას ადგილობრივ პოლიტიკოსებზე, კოორდინაციას უწევდა სეპარატისტთა სამხედრო მოქმედებებს და თავად ახორციელებდა სამხედრო ოპერაციებს  აღმოსავლეთ უკრაინაში - იუწყება BBC-ის რუსული სამსახურის კორესპონდენტი სასამართლო დარბაზიდან.
[გადაწყვეტილება სრულად ჯერ არ გამოცხადებულა]

თვითმფრინავი, რომლის  ბორტზეც 298 ადამიანი იმყოფებოდა, ამსტერდამი-კუალა-ლუმპურის რეისს ასრულებდა.
საერთაშორისო საგამოძიებო ჯგუფმა დაასკვნა, რომ თვითმფრინავი ბუკის საზენიტო სარაკეტო სისტემიდან ჩამოაგდეს, რომელიც კურსკში დისლოცირებულ რუსეთის შეიარაღებული ძალების 53-ე საზენიტო-სარაკეტო ბრიგადას ეკუთვნის.

მალაიზიური ბოინგის ჩამოგდებაში ნიდერლანდებმა და ავსტრალიამ რუსეთი მაშინვე დაადანაშაულეს, თუმცა მოსკოვი ამ დრომდე ბრალდებას უარყოფს და პოლიტიზებულს უწოდებს.