ნიკა გვარამია არის სუპერ პოლიტიკური პატიმარი, სწორედ ამის გამო მოხდა ივანიშვილის დასანქცირების დაჩქარება, ისევე როგორც ექსპრეზიდენტის პატიმრობა, რამაც მოგვჭრა თავი როგორც სახელმწიფოს - ამბობს ლეიბორისტული პარტიის ლიდერი შალვა ნათელაშვილი მთავარი არხის პირდაპირ ეთერში, "შაბათის მთავარში" სტუმრობისას.
ნათელაშვილის თქმით, ცივილიზებულ სამყაროში მედიამენეჯერებს არ იჭერენ და ექსპრეზიდენტებს არ ექცევიან ისე, როგორც მესამე პრეზიდენტს ექცევა "ოცნების" ხელისუფლება:

"მე პირდაპირ გეტყვით, ჩემი და სააკაშვილის დამოკიდებულება არ არის მაინცდამაინც ჰარმონიული. უამრავი პრეზიდენტია, იგივე ჟაკ შირაკი, მისჯილი იყო რომ გარდაიცვალა. სარკოზი- მისჯილი აქვს, არ იჭერენ პრეზიდენტებს ასე, არ ათრევენ ციხე-ციხე, მიუსჯიან რაღაცას თუ მართლა დანაშაული აქვს ჩადენილი  და შინაპატიმრობით, სამაჯურის წესით იხდის. ეს იცის ცივილიზებულმა მსოფლიომ და როცა მსოფლიო ხედავს, რომ შენ ასე ექცევი მასმედიას, ასე ექცევი ყოფილ პრეზიდენტს და ასე გაქ თავზე ხელი აღებული და  მხოლოდ პუტინის დავალებებში ხარ ოპერატიული, რა თქმა უნდა ამ შემთხვევაში უკვე ქართულ სახელმწიფოს პატივს არავინ აღარ სცემს. ჩვენ უნდა აღვადგინოთ პატივისცემა ქართული სახელმწიფოებრიობის, ქართველი ხალხის მიმართ. ოლიგარქს ელოდება წინ კარგ შემთხვევაში ქართული სასამართლო და მაქსიმალურ შემთხვევაში, მე ვიბრძოლებ ამისთვის, ლეიბორისტული პარტია ყველაფერს გააკეთებს, რომ საერთაშორისო ტრიბუნალმა გაასამართლოს მის მიერ ჩადენილი საერთაშორისო დანაშაულებებისთვის" განაცხადა "ლეიბორისტული პარტიის" ლიდერმა, შალვა ნათელაშვილმა "შაბათის მთავარის" ეთერში.