გაეროს საგამოძიებო კომისიის თავმჯდომარემ, ერიკ მოსემ, ადამიანის უფლებათა საბჭოში სიტყვით გამოსვლისას თქვა, რომ მისმა კომისიამ შეაგროვა მტკიცებულებები რუსი სამხედროების მიერ უკრაინაში ჩადენილი სამხედრო დანაშაულების შესახებ „უზარმაზარი მასშტაბით“.
მისი თქმით, საუბარია გაუპატიურებაზე, არასრულწლოვანთა წამებასა და მშვიდობიანი მოსახლეობის მკვლელობაზე.

„შეგროვებული მტკიცებულებების საფუძველზე, კომისიამ დაასკვნა, რომ უკრაინაში სამხედრო დანაშაულები იყო ჩადენილი“, - თქვა მან. 

მოსეს თქმით, გაეროს ჯგუფი ეწვია 27 დასახლებას, გაესაუბრა 150 მსხვერპლს და თვითმხილველს და დაათვალიერა ოკუპაციისგან გათავისუფლებულ ტერიტორიებზე პატიმრების დაკავების ადგილები.
ცნობისთვის, გაეროს საგამოძიებო კომისია შეიქმნა ადამიანის უფლებათა საბჭოს მიერ მარტში, უკრაინაში რუსეთის შეჭრის შემდეგ.