რუსეთის საგარეო საქმეთა სამინისტროს სპიკერმა მარია ზახაროვამ, აშშ-ს პრეზიდენტის გამოსვლას გაეროს გენერალური ასამბლეის 77-ე სესიაზე, "უხამსი" უწოდა.

"რაც შეეხება შეერთებული შტატების პრეზიდენტის გამოსვლას, მე მიმაჩნია, რომ ის აბსოლუტურად უხამსი იყო. ფაქტია, რომ მან დაიწყო ვითომ რუსეთის პრეზიდენტის ციტირებით. მან რუსეთის პრეზიდენტს მიაწერა სიტყვები, რომ ჩვენი ქვეყანა მსოფლიოს ემუქრება ბირთვული იარაღით“, - თქვა მან სოლოვიევის გადაცემის პირდაპირ ეთერში.

ზახაროვას თქმით, "ბაიდენისა და დასავლური მედიის პროპაგანდა ეწინააღმდეგება იმას, რაც რეალურად ითქვა“.
აშშ-ს პრეზიდენტმა გაეროში სიტყვით გამოსვლისას პუტინის მიერ გამოცხადებულ ნაწილობრივ მობილიზაციასა და მუქარას გამოეხმაურა. ამისი თქმით, მოსკოვი "უპასუხისმგებლოდ" იქცევა, როდესაც ბირთვული იარაღის გამოყენებით იმუქრება - "ბირთვულ ომს ვერავინ მოიგებს და ეს არასდროს უნდა მოხდეს".