აშშ-ის და ევროკავშირის დიპლომატებმა 16 სექტემბერს შეძრწუნებით უპასუხეს საფლავების აღმოჩენას უკრაინაში, იზიუმში, რამდენიმე დღეში მას შემდეგ, რაც უკრაინამ ჩრდილოაღმოსავლეთის ხარკოვის რეგიონში წარმატებული კონტრშეტევის წარმოებით ქალაქი რუსეთის ძალებისგან დაიბრუნა.
დიპლომატები ცხადებენ, რომ რუსეთმა პასუხი უნდა აგოს, იმ ფონზე, როცა უკრაინის ოფიციალური პირების თქმით, საფლავებში აღმოჩენილი გვამების უმეტესობა სამოქალაქო პირებისაა.
უკრაინაში აშშ-ის ელჩმა, ბრიჯიტ ბრინკმა ტვიტერით დაწერა, რომ მასობრივი სამარხის აღმოჩენამ "უნდა გააძლიეროს ჩვენი კოლექტიური მისწრაფება რუსეთისთვის პასუხისმგებლობის დაკისრებაზე, მისი სისასტიკის გამო". აშშ-ის სახელმწიფო მდივნის, ენტონი ბლინკენის განცხადებით, რუსეთი "შემაძრწუნებლად" იქცევა და სავარაუდოდ ომის დანაშაულებზეა პასუხისმგებელი, ევროკავშირის საგარეო-პოლიტიკურმა ლიდერმა, ჟოზეპ ბორელმა თქვა, რომ ევროკავშირი "ღრმად შოკირებულია" საფლავების აღმოჩენის გამო და "უმკაცრესად გმობს ამ სისასტიკეს".
უკრაინის თავდაცვის სამინისტროს განცხადებით, ნაპოვნია სულ მცირე 440 გვამი, ხარკოვის გუბერნატორი, ოლეჰ სინეჰუბოვი ამბობს, რომ ნაპოვნი გვამების 99 პროცენტს ძალადობრივი სიკვდილის ნიშნები ეტყობა.
საფლავების აღმოჩენის თაობაზე რუსეთს კომენტარი არ გაუკეთებია, თუმცა პრეზიდენტმა ვლადიმირ პუტინმა განაცხადა, რომ ომს გააგრძელებს. მისი თქმით, რუსეთის მთავარ სამხედრო ამოცანად რჩება უკრაინის მთელი დონბასის რეგიონის "გათავისუფლება".