რუსეთის თავდაცვის მინისტრი სერგეი შოიგუ "აბსოლუტურ სიცრუეს" უწოდებს მასობრივი საინფორმაციო საშუალებებით გავრცელებულ ცნობებს, თითქოს რუსეთი გეგმავდეს ტაქტიკური ბირთვული ან ქიმიური იარაღის გამოყენებას უკრაინაში მიმდინარე სპეციალური ოპერაციის დროს.

"სამხედრო თვალსაზრისით დასახული მიზნების მისაღწევად, არ არსებობის უკრაინაში ბირთვული იარაღის გამოყენების აუცილებლობა. რუსეთის ბირთვული შეიარაღების მთავარი დანიშნულება ბირთვული თავდასხმის შეკავებაა. მისი გამოყენება შემოიფარგლება ისეთი საგანგებო ვითარებით, რომელიც განსაზღვრულია ფართო გაცნობისთვის ღია რუსეთის სახელმძღვანელო დოკუმენტებით", - აღნიშნა რუსეთის თავდაცვის მინისტრმა უსაფრთხოების საერთაშორისო კონფერენციაზე სიტყვით გამოსვლის დროს.
პრეზიდენტ პუტინის პრესმდივანმა პესკოვმა 22 მარტს ამერიკულ ტელეკომპანია CNN-ს განუცხადა, რომ რუსეთს შეუძლია ბირთვული იარაღის გამოყენება, თუ ქვეყანას „ეგზისტენციალური საფრთხე“ დაემუქრება.

"ჩვენ გვაქვს ეროვნული უსაფრთხოების კონცეფცია, ის საჯაროდ ხელმისაწვდომია, შეგიძლიათ წაიკითხოთ ყველა მიზეზი, რის გამოც ბირთვული იარაღის გამოყენება შეიძლება. ანუ, თუ ქვეყნის არსებობას შეექმნება საფრთხე, მაშინ ის შეიძლება გამოყენებულ იქნას ჩვენი კონცეფციის შესაბამისად. ამ ტექსტში სხვა მიზეზები არ არის ნახსენები", - განაცხადა პესკოვმა ამერიკულ ტელეკომპანია „სი-ენ-ენთან“ ინტერვიუში.
უკრაინის წინააღმდეგ ომის დაწყებიდან რამდენიმე დღეში, 27 თებერვალს, პრეზიდენტმა პუტინმა საბრძოლო მზადყოფნის განსაკუთრებულ რეჟიმში გადაიყვანა სტრატეგიული შეკავების ძალები, რომელთა არსენალში ბირთვული იარაღიცაა.