თურქეთის თავდაცვის მინისტრმა, ჰულუსი აკარმა თქვა, რომ რუსმა ოფიციალურმა პირებმა ანკარას  განუცხადეს, რომ მოსკოვს „არაფერი აქვს საერთო“ ოდესის პორტზე სარაკეტო თავდასხმებთან.

„რუსეთთან ჩვენი კონტაქტების დროს მათ გვითხრეს, რომ მათ ამ თავდასხმასთან არანაირი კავშირი არ ჰქონდათ და რომ ისინი ძალიან ფრთხილად და დეტალურად სწავლობენ ამ საკითხს“, - განუცხადა აკარმა ჟურნალისტებს.

თურქეთი შეშფოთებულია, რომ აფეთქებები მოხდა მარცვლეულის ექსპორტის შესახებ შეთანხმების ხელმოწერისთანავე, რომელიც რუსეთმა და უკრაინამ პარასკევს სტამბოლში გააფორმეს, დასძინა ოფიციალურმა წარმომადგენელმა. 
შეთანხმებებს ხელი მოეწერა თურქეთის პრეზიდენტის რეჯეფ თაიფ ერდოღანისა და გაეროს გენერალური მდივნის ანტონიო გუტერეშის თანდასწრებით.
ცნობისთვის, დღეს დილით, ოდესის პორტში აფეთქებების ხმა გაისმა. უკრაინის შეიარაღებული ძალების ინფორმაციით, რუსებმა ოდესის პორტში კალიბრის ტიპის ოთხი რაკეტა გაუშვეს, რომელთაგან ორი საჰაერო თავდაცვამ ჩამოაგდო, ორი პორტის ინფრასტრუქტურას მოხვდა, მაგრამ მარცვლეულის საწყობი არ დაზიანებულა.