ამერიკული მაღალი მობილობის სარაკეტო–საარტილერიო სისტემები HIMARS, რომლებიც უკრაინის შეიარაღებულ ძალებს გადაეცა, არაპირდაპირ, თუმცა მნიშვნელოვან გავლენას ახდენენ რუსეთთან ფრონტის ხაზზე საბრძოლო ოპერაციებზე. ამის შესახებ პენტაგონის საიტზე წერია.
პენტაგონის მაღალჩინოსანი აღნიშნავს, რომ სისტემა M142 HIMARS ერთდროულად რამდენიმე მაღალი სიზუსტის რაკეტის გაშვების საშუალებას იძლევა. აშშ–მ უკვე მისცა უკრაინას 8 სისტემა, გასულ კვირას კი კიდევ ოთხის გაგზავნას შეპირდა. ამგვარად, მალე უკრაინას 12 ჰაიმარსი ექნება.
„უკრაინელები ანადგურებენ ისეთ სამიზნეებს, როგორიც არის იარაღის და საბრძოლო მასალების, მომარაგების, სხვა მატერაილურ–ტექნიკური საშუალებების საწყობები, მართვის ცენტრები. და ეს ყველაფერი პირდაპირ ახდენს გავლენას ფრონტის წინა ხაზზე ოპერაციების ჩატარების შესაძლებლობაზე. ამიტომაც, მართალია უკრაინელები HIMARS–ს ფრონტის წინა ხაზზე არ ისვრიან, მაგრამ ისინი ძალიან დიდ გავლენას ახდენენ ომის მიმდინარეობაზე“– ამბობს ჩინოვნიკი.
ის ხაზს უსვამს, რომ მართალია რუსებმა უკრაინასთან ომში გარკვეულ წარმატებებს მიაღწიეს, ეს ძალიან რთულად მოახერხეს, ახლა კი ოკუპანტების შეტევა შენელდა.
“ჩვენი შეფასებით, რუსულ ძალებს შეზღუდული მიღწევები აქვთ ჩრდილოეთ დონბასში, რადგან მათ უკრაინის თავდაცვის ძალები აკავებენ. რუსი სამხედროები განაგრძობენ არაზუსტ საარტილერიო დარტყმებს საჰაერო სარაკეტო დარტყმებთან ერთად“– ამბობს ჩინოვნიკი.
პენტაგონის შეფასებით, ხარკოვთან უკრაინელები განაგრძობენ რუსების მხრიდან პოზიციების დაკავების მცდელობების მოგერიებას. იგივე სიტუაციაა სლავიანსკის გარეუბნებში. რუსები საჯაროდ აცხადებდნენ, რომ მათ უნდოდათ სლავიანსკში შესვლა, მაგრამ აქამდე ეს ვერ შეძლეს.