საქართველოში აშშ-ის ელჩი კელი დეგნანი „ქართული ოცნებიდან“ წასული წევრების მიერ მის მიმართ გამოთქმულ კრიტიკას კიდევ ერთხელ ეხმიანება და აცხადებს, რომ აშშ ყველაფერს აკეთებს იმისთვის, რომ უკრაინაში პუტინის მიერ დაწყებული ომი სხვა ქვეყნებზე, მათ შორის საქართველოზე არ გავრცელდეს.
"აშშ არ იშურებს ძალისხმევას, რომ პუტინის არაპროვოცირებული ომი უკრაინაში არ გავრცელდეს სხვა ქვეყნებზე, იქნება ეს საქართველო, თუ ნებისმიერ სხვა ქვეყანა. ჩვენ ყოველდღიურად ძალიან ბევრს ვშრომობთ, რათა შეწყდეს ეს ომი, რაც შეიძლება მალე. ეს გაუმართლებელი ომი დაიწყო პუტინმა და მასვე შეუძლია დაასრულოს. აშშ აკეთებს ყველაფერს, რომ აღდგეს მშვიდობა და სტაბილურობა და გავაგრძელებთ ჩვენს თანამშრომლობას იმისთვის, რომ საქართველოს ჰქონდეს წარმატებული მომავალი, გახდეს ევროკავშირის, ნატო–ს წევრი, ჩვენ ძალიან კარგი პარტნიორობა გვაქვს წლების მანძილზე, მიუხედავად იმისა რომელი პარტიაა მმართველი", – აცხადებს ელჩი.
ბოლო პერიოდში „ქართული ოცნების“ წარმომადგენლები და მათი მხარდამჭერები საუბრობენ, რომ დასავლეთის ქვეყნებს საქართველოს ომში ჩაბმა სურთ. ისინი ქვეყნის ომში ჩართვის მცდელობაში თავდაპირველად ადანაშაულებდნენ ოპოზიციასა და უკრაინის ხელისუფლების წარმომადგენლებს, შემდეგ ევროკავშირის მიერ კანდიდატის სტატუსზე გადაწყვეტილების მიღებაც ომში ჩართვაზე უარს დაუკავშირეს.
8 ივლისს მიხეილ ყაველაშვილმა, რომელმაც "ქართული ოცნების" რიგები თანაგუნდელებთან – სოზარ სუბართან და დიმიტრი ხუნდაძესთან ერთად "შიდა პოლიტიკურ პროცესებზე საზოგადოებისთვის მეტი ინფორმაციის მიწოდების" მიზნით დატოვა, ევროკავშირზე შეთქმულების თეორიის გავრცელების შემდეგ სამიზნეში საქართველოში აშშ–ის ელჩ კელი დეგნანი ამოიღო.
ცოტა ხნის წინ აშშ-ის ელჩმა კელი დეგნანმა აღნიშნა, რომ ნარატივი, რომ ვინმეს საქართველოს რუსეთის წინააღმდეგ ომში ჩაბმა სურს, ФСБ-ს სახელმძღვანელოდან ამოღებული დეზინფორმაციაა.