რუსეთის ფედერაცია გაზსადენ „ჩრდილოეთ ნაკადით“ გაზის მიწოდებას წყვეტს, რომელიც რუსეთიდან ევროპაში გაზის ექსპორტის მთავარი მარშრუტია, - ინფორმაციას რუსული მედია ავრცელებს.
მათივე ცნობით, გადაწყვეტილება დაგეგმილი სარემონტო სამუშაოების გამო მიიღეს და გაზსადენი მხოლოდ 10 დღით - 21 ივლისამდე გაჩერდება.
ამრიგად, რუსული გაზის დასავლეთ და ცენტრალური ევროპის ქვეყნებში მიწოდებისთვის ერთადერთ მარშრუტად უკრაინის გაზის ტრანსპორტირების სისტემა რჩება.
აღსანიშნავია, გაზსადენი, ტექნიკური სამუშაოების განხორციელების მიზნით, წელიწადში ერთხელ იხურება, მაგრამ ევროკავშირი შიშობს, რომ ამჯერად მოსკოვი გაზის მიწოდებას რემონტის საბაბით შეაჩერებს.