თურქეთის პრეზიდენტი რეჯეფ თაიფ ერდოღანი აცხადებს, რომ სიკვდილით დასჯის აღდგენას დათანხმდება იმ შემთხვევაში, თუ ამ საკითხთან დაკავშირებით მას პარლამენტი კანონპროექტს გაუგზავნის. 
„საჭიროების შემთხვევაში, ეს უნდა დაბრუნდეს დღის წესრიგში და გადაიზარდოს დებატებში. ვნახოთ, რა გამოვა. 
ადრე ვთქვი, თუ პარლამენტი მიიღებს მსგავს გადაწყვეტილებას, მე მას მხარს დავუჭერ“, - აღნიშნა ერდოღანმა.
გასულ კვირას თურქეთის იუსტიციის მინისტრმა განაცხადა, რომ თურქეთი განიხილავს 2004 წელს გაუქმებული სიკვდილის დასჯის აღდგენას მას შემდეგ, რაც პრეზიდენტმა ადრე ეს საკითხი ქვეყანაში გაჩენილი ტყის ხანძრების გამოწვევის მიზეზებთან დაკავშირებით წამოჭრა.
მისმა ნაციონალისტმა მოკავშირემ დევლეტ ბახჩელმა მხარი დაუჭირა ამ იდეას და თქვა, რომ სასჯელი უნდა გავრცელდეს ტერორიზმზე, გაუპატიურებასა და ქალების მკვლელობაზე.