ბრიტანეთმა, რუსეთის მოქალაქეებსა და კომპანიებს, რომელთაგან ზოგიერთი ვლადიმერ პუტინის "შიდა წრეში" შედის, სანქციები დაუწესა. ამის შესახებ ინფორმაციას CNN ავრცელებს.

სანქცირებულთა სიაში მოხვდა ვლადიმერ პოტანინი, რომელსაც ბრიტანეთის მთავრობა მოიხსენიებს, როგორც რუსეთის მეორე უმდიდრეს ადამიანს, რომლის ქონებაც დაახლოებით 16 მლრდ დოლარს შეადგენს და რომელიც, კრემლის მთავარი მხარდამჭერია.

გარდა ამისა სანქციები დაეკისრა, პუტინის ბიძაშვილი ანნა ცივილევას, როგორც რუსული ქვანახშირის მომპოვებელი კომპანიის პრეზიდენტს. ბრიტანეთი მიიჩნევს, რომ ცივილევამ და მისმა მეუღლე სერგეი ცივილევმა პუტინთან ურთიერთობით მნიშვნელოვნად ისარგებლეს.

გარდა ამისა, დიდი ბრიტანეთი უახლოეს სანქციებს უწესებს რუს მოქალაქეებსა და კომპანიებს, რომლებიც სირიაში, ასადის რეჟიმს მხარს უჭერენ.

"სანამ პუტინი აგრძელებს საზიზღარ თავდასხმას უკრაინაზე, ჩვენ გამოვიყენებთ სანქციებს რუსული ომის მანქანის დასასუსტებლად", - განაცხადა გაერთიანებული სამეფოს მთავრობის წარმომადგენელმა.

მთავრობამ განაცხადა, რომ დანერგავს ზომებს, რათა რუსეთმა არ გამოიყენოს გაერთიანებული სამეფოს ტრასტის სერვისები, რომლებიც გამოიყენება სხვების აქტივების მართვისთვის.