ნატო-ს გენერალური მდივნის იენს სტოლტენბერგის განცხადებით, ბრიუსელში დღეს ალიანსის თავდაცვის მინისტერიალის ფარგლებში გამართულ შეხვედრაზე, მათ შორის საქართველოსთვის პრაქტიკული მხარდაჭერის გაძლიერების საკითხს განიხილავენ.
ამის შესახებ მან მინისტერიალის დაწყებამდე გამართულ ბრიფინგზე განაცხადა.
"დღეს საღამოს ჩვენ შევხვდებით უკრაინის, საქართველოს, შვედეთისა და ფინეთის თავდაცვის მინისტრებს, ასევე – ევროკავშირის წარმომადგენელს. ეს ერთის მხრივ, იქნება შესაძლებლობა, რომ უკრაინის თავდაცვის მინისტრმა რეზნიკოვმა მოგვაწოდოს ინფორმაცია იმის შესახებ, თუ რა სჭირდება უკრაინას სასწრაფოდ, ხოლო მეორეს მხრივ, ეს იქნება ასევე შესაძლებლობა, ნატო–ს მოკავშირეებმა უკრაინის მხარდაჭერის ახალი განცხადებები გააკეთონ. მოკავშირეები მზად არიან, გააგრძელონ სამხედრო აღჭურვილობის მიწოდება, რომელიც უკრაინას სჭირდება, მძიმე იარაღისა და შორ მანძილზე მოქმედი სისტემების ჩათვლით. ჩვენ ასევე განვიხილავთ, თუ როგორ გავაძლიეროთ პრაქტიკული მხარდაჭერა რისკის ქვეშ მყოფი სხვა პარტნიორებისთვის, მათ შორის ბოსნია ჰერცეგოვინასა და საქართველოს", – განაცხადა სტოლტენბერგმა.
შეგახსენებთ, რომ ბრიუსელში 15–16 ივნისს ნატო–ს თავდაცვის მინისტერიალი იმართება.