უკრაინის პრეზიდენტმა, ვოლოდიმირ ზელენსკიმ უნგრეთის წინააღმდეგობა რუსულ ნავთობზე ემბარგოს დაწესებასთან დაკავშირებით გააკრიტიკა.
"ჩვენ სანქციების მეექვსე პაკეტამდე მივედით, რომელშიც ნავთობის ემბარგო შედის. ყველა ამბობს: ამ პერიოდის განმავლობაში რუსეთი $200 მილიარდს გამოიმუშავებს და ნებისმიერი იარაღის ყიდვას შეძლებს. მეექვსე პაკეტი ამოქმედდა? არა. რატომ? რაღაც ჭირს ნავთობს. რატომღაც ისინი სამყაროს არასწორად უყურებენ". - თქვა ზელენსკიმ.
ამასთან ერთად, უნგრეთის საგარეო საქმეთა მინისტრმა, პიტერ სიიარტომ აღნიშნა, უნგრეთი ევროკავშირის რუსულ ნავთობზე ემბარგოს ინიციატივას მხარს დაუჭერს იმ შემთხვევაში, თუ ბლოკი პრობლემის გადაწყვეტის ალტერნატიულ გზას შესთავაზებს.
"ჩვენ ევროკომისიას ნათლად ავუხსენით, რომ ამ წინადადებას მხოლოდ იმ შემთხვევაში მივცემთ ხმას, თუ ბრიუსელი პრობლემის გადაჭრის სწრაფ გზას დასახავს". - თქვა სიიარტომ.
რუსეთის წინააღმდეგ ევროკავშირის სანქციების მეექვსე პაკეტს, რომელიც რუსული ნავთობის იმპორტის აკრძალვასაც მოიცავს, ისეთი ფორმით, როგორც ახლა განიხილება, უნგრეთი მხარს "ვერ დაუჭერს" - ამის შესახებ ქვეყნის პრემიერმინისტრმა, ვიქტორ ორბანმა განაცხადა.
ორბანის განცხადებით, ევროკომისიის ახლანდელი წინადადება რუსული ნავთობის იმპორტის აკრძალვის შესახებ უნგრეთის ეკონომიკაზე ჩამოგდებული ატომური ბომბის ტოლფასი იქნება. მისივე თქმით, უნგრეთი მოსალაპარაკებლად მზად იყო, თუ დაინახავდა ისეთ წინადადებას, რომელიც ქვეყნის ინტერესებს დაიცავდა.
ორბანის თქმით, უნგრეთს, შესაძლოა, 5 წელი და თავის გადამამუშავებელ ქარხნებსა და მილსადენებში მსხვილი ინვესტიციების განხორციელება დასჭირდეს იმისთვის, რომ შეძლოს მისი ამჟამინდელი სისტემის გარდაქმნა, რომელიც, დაახლოებით, 65%-ით რუსულ ნავთობზეა დამოკიდებული.