რუსეთის თავდაცვის მინისტრმა სერგეი შოიგუმ განაცხადა, რომ რუსეთი უკრაინაში მიზანმიმართულად ანელებს სპეცოპერაციის ტემპს, რათა მოხდეს ევაკუაცია და თავიდან აიცილონ მშვიდობიანი მოსახლეობის მსხვერპლი.
„მაცხოვრებლებმა უნდა დატოვონ გარშემორტყმული დასახლებები, იქმნება ჰუმანიტარული დერეფნები. რუსული ჯარები, უკრაინის შეიარაღებული ძალებისგან განსხვავებით, არ ურტყამს სამოქალაქო ინფრასტრუქტურას, სადაც შეიძლება იყოს მშვიდობიანი მოსახლეობა. მტრის საცეცხლე პოზიციებს და სამხედრო ობიექტებს მაღალი სიზუსტის იარაღი ხვდება“, - განაცხადა შოიგუმ.
მან, ასევე, აღნიშნა, რომ დასავლეთის ქვეყნებმა, უკრაინის ჯარების დამარცხების შიშით, სასწრაფოდ გააგზავნეს უკრაინაში ლეტალური იარაღი.