New York Times-ი რუსი მედესანტეების მიერ, ბუჩაში რვა ადამიანი სიკვდილით დასჯის ვიდეოს აქვეყნებს. გამოცემამ მსხვერპლთა ვინაობაც დაადგინა.
ესენი არიან: ანატოლი პრიხოდკო, ანდრეი მატვიჩუკი, ანდრეი ვერბოვი, დენის რუდენკო, ანდრეი დვორნიკოვი, სვიატოსლავ ტუროვსკი, ვალერი კოტენკო და ვიტალი კარპენკო.
43 წლის მშენებელი, ივან სკიბა კი სიკვდილს გადაურჩა.

რაც შეეხება თავად ფაქტს. ის ბუჩაში იაბლონსკას ქუჩაზე მოხდა.  New York Times-ის ინფორმაციით, რუსი მედესანტეები პატრულირებისას სახლებს ჩხრეკდნენ, იმავე ქუჩაზე, ივან სკიბა და კიდევ 5 უკრაინელი მორიგეობდნენ იმპროვიზებულ საგუშაგოზე. მათ ადგილობრივები გააფრთხილეს რუსების მოახლოების თაობაზე, რის შემდეგაც  ერთ-ერთის სახლში დაიმალნენ.  დაახლოებით ერთ საათში რუსებმა მათ სამალავს მიაგნეს და იარაღის მუქარით უკრაინელები ქუჩაში გაიყვანეს, დააჩოქეს და ისე დახვრიტეს.
დაღუპული ადამიანების ცხედრები ეზოში თვეზე მეტხანს იყო.
გამოცემის ცნობით, მედესანტეები, რომლებმაც მოქალაქეები დახოცეს, რუსეთის ქალაქ ფსკოვიდან არიან. 
ადგილზე დატოვებული და შემდეგ აღმოჩენილი მტკიცებულებებით ირკვევა, რომ რუსი სამხედროები  104-ე პოლკიდან იყვნენ.
შეგახსენებთ, ბუჩას დროებითი ოკუპაციისას, რუსეთი განსაკუთრებული სისასტიკით გაუსწორდა ადგილობრივ მშვიდობიან მოსახლეობას. მას შემდეგ, რაც დამპყრობლებმა ოლქი დატოვეს და იქ უკრაინის შეიარაღებული ძალები შევიდა, აღმოაჩინეს ხელ-ფეხშეკრული და დახვრეტილი ადამიანები, საერთო სამარხები, წამების ოთახები, ნაწამები, გაუპატიურებული და მოკლული ბავშვები.