COVID-19-ით ინფიცირებულ ჰოსპიტალიზებულ პაციენტთა ორ-მესამედზე ოდნავ მეტის მდგომარეობა ექსპერიმენტული ანტივირუსული პრეპარატით მკურნალობის შემდეგ გაუმჯობესდა. ამის შესახებ სულ ახლახან დასრულებული ცდების შედეგები მიუთითებს.
კორონავირუს SARS-CoV-2-ით გამოწვეული ახალი დაავადება COVID-19-ის პაციენტები ექსპერიმენტულ პრეპარატ რემდესივირის ტესტირების პროგრამაში მონაწილეობდნენ. მართალია, ეს გახლავთ რემდესივირის შესახებ ამ დრომდე ჩატარებული უდიდესი ცდა, მაგრამ მასში მხოლოდ 53 პაციენტი მონაწილეობდა, რაც არც თუ ისე დიდი რიცხვია და ექსპერტები ნაადრევი დასკვნების გამოტანისგან თავს იკავებენ. კვლევა წამყვან სამედიცინო ჟურნალ The New England Journal of Medicine-ში გამოქვეყნდა.
„ამ ეტაპზე არ არსებობს COVID-19-ის სამკურნალო დადასტურებული საშუალება. ამ მონაცემებიდან საბოლოო დასკვნების გამოტანა არ შეგვიძლია, მაგრამ იმედისმომცემია დაკვირვებები ჰოსპიტალიზებულ პაციენტთა ამ ჯგუფზე, რომელიც რემდესივირს იღებდა“, — ამბობს კვლევის ავტორი, სიდარ-საინაის სამედიცინო ცენტრის ეპიდემიოლოგიური ჰოსპიტლის დირექტორი, დოქტორი ჯონათან გრეინი. რემდესივირის მწარმოებელი კომპანიის, Gilead-ის უფროსი სამედიცინო ოფიცერი მერდად პერსი მონაცემებს „იმედისმომცემს“, მაგრამ „შეზღუდულს“ უწოდებს.
"61-მა პაციენტმა რემდესივირის სულ მცირე ერთი დოზა მიიღო 10 დღის განმავლობაში, ე. წ. თანაგრძნობით სარგებლობის საფუძველზე — პროგრამა, რომელიც ადამიანებს ჯერ დაუდასტურებელი პრეპარატების გამოყენების უფლებას აძლევს მაშინ, როდესაც არ არსებობს სხვა სამკურნალო საშუალება. რვა მათგანის ანალიზები შეუძლებელი აღმოჩნდა (შვიდი პაციენტის შესახებ არ არსებობს მკურნალობის შემდგომი მონაცემები, ერთთან კი მოხდა დოზირების შეცდომა). დარჩენილი 53 პაციენტიდან, რომელთა მონაცემების ანალიზიც მოხდა, 22 აშშ-ში იმყოფებოდა, 22 ევროპასა და კანადაში, 9 იაპონიაში. 30 პაციენტს (57%) ესაჭიროებოდა მექანიკური ვენტილაცია, ოთხს (8%) ექსტრაკორპორალური მემბრანული ოქსიგენაცია.
საშუალოდ 18 დღის განმავლობაში, გაუმჯობესდა 36 პაციენტის მდგომარეობა (68%). მექანიკური ვენტილაციის საჭიროების მქონე 30 პაციენტიდან 17-ს ასეთი დახმარება აღარ დასჭირდა, ანუ სასუნთქი აპარატებიდან მოხსნეს. სახლში გაეწერა სულ 25 პაციენტი (47%), შვიდი კი (13%) გარდაიცვალა; სიკვდილიანობა ყველაზე მაღალი, 18 პროცენტი (34-დან 6) აღმოჩნდა ინვაზიური ვენტილაციის საჭიროების მქონე პაციენტებში, 5 პროცენტი კი (19-დან 1) მათ შორის, ვისაც ინვაზიური ვენტილაცია არ სჭირდებოდა.
უკეთესი დასკვნების გაკეთების საშუალებას მოგვცემს რემდესივირის რანდომიზებული კლინიკური ცდები, რომლებიც ამჟამად მიმდინარეობს. ორი ასეთი კვლევა ხორციელდება ჩინეთშიც, რომელთა შედეგებიც აპრილის შუა რიცხვებში გახდება ცნობილი.
რემდესივირს თავის მხრივ ტესტავენ როგორც მწარმოებელი Gilead-ი, ისე ჯანდაცვის მსოფლიო ორგანიზაცია.