ევროკავშირი მხარს უჭერს საევაკუაციო ღონისძიებებს და გადაუდებელ დახმარებას აღმოუჩენს უკრაინას,– განაცხადა ევროკავშირის უმაღლესმა კომისარმა საგარეო და უსაფრთხოების საკითხებში ჯოზეფ ბორელმა.
მისი თქმით, რუსეთი ცალმხრივად ახორციელებს აგრესიას, ესკალაციას, რასაც ომისკენ მივყავართ და ევროკავშირი ყველა რესურს ჩადებს რუსეთის მიერ შექმნილი კრიზისის გადაწყვეტაში.
ამასთან, მისი თქმით, დღეს გაიმართება მსჯელობა რუსეთისთვის უმკაცრესი სანქციების დაწესების თაობაზე. 
„ეს არის ყველაზე უფრო ბნელი დრო ევროპისთვის მეორე მსოფლიო ომის შემდეგ! ბირთვულმა ზესახელმწიფომ განახორციელა შეტევა მეზობელ ქვეყანაზე და სხვა ქვეყნებმა ზომები უნდა მიიღონ სიტუაციის სტაბილიზაციისთვის. ეს არა მხოლოდ საერთაშორისო სამართლის პრინციპების, ჰუმანიტარული პრინციპების დარღვევაა: ეს გამოიწვევს უამრავი სიცოცხლის დაკარგვას და არაპროგნოზირებად შედეგებს. ევროკავშირი რეაქციას მისცემს ასეთ ქმედებებს. ევროსაბჭოს პრეზიდენტმა შეხვედრა მოიწვია საღამოსთვის და ის მოგვცემს პოლიტიკურ მითითებებს, პაკეტს ჩვენი სანქციებისა, რომელიც უნდა განვახორციელოთ. ეს იქნება ყველაზე ძლიერი სანქციები მათ შორის, რაც ოდესმე დაგვიწესებია. ეს არის ევროკავშირის პოზიცია. უზრუნველყოფთ, რომ საერთაშორისო საზოგადოებამ სწორი ინფორმაცია მიიღოს ვითარების შესახებ.
სასწრაფოდ შეაჩეროს რუსეთმა ეს მიუღებელი ქცევა, წინააღმდეგ შემთხვევში რუსეთის ხელმძღვანელობა უპრეცედენტო იზოლაციაში აღმოჩნდება. ეს არ არის მხოლოდ დიპლომატიური განხილვის საგანი, ეს სიკვდილ–სიცოცხლეს ეხება, ეს გლობალური საზოგადოების მომავალია. ჩვენ ერთიანნი ვიქნებით, რათა დავიცვათ უკრაინა, ვუზრუნველყოფთ, რომ პოლიტიკურ თამაშებს განადგურება არ მოჰყვეს. ჩვენი ძალა არასათანადოდ არ უნდა შეფასდეს",– განაცხადა ბორელმა.
24 თებერვალს რუსეთმა უკრაინის წინააღმდეგ ომი დაიწყო.