ყურადღებით ვადევნებთ თვალს უკრაინაში მიმდინარე პროცესებს - საგარეო საქმეთა სამინისტრო განცხადებას ავრცელებს და წერს, რომ საქართველოს საელჩო კიევში, ასევე გენერალური საკონსულოები ოდესასა და დონეცკში, მუშაობის საგანგებო რეჟიმზე არიან გადასული.
უწყება იმ საფრთხეებზე საუბრობს, რომელიც ახლა უკრაინაში რუსეთის მხრიდან მზარდი აგრესიის ფონზე არსებობს, თუმცა განცხადებაში რუსეთს არ ახსენებს.

"უკრაინაში ვითარების შემდგომი ესკალაციის  მაღალი ალბათობის გათვალისწინებით, საქართველოს საელჩო ქ. კიევში და გენერალური საკონსულოები ქ.ოდესაში, ქ. დონეცკში (რეზიდენციით კიევი) გადასული არიან მუშაობის საგანგებო რეჟიმზე. უკრაინის ტერიტორიაზე მყოფი საქართველოს მოქალქეებისთვის მოქმედებს ცხელი ხაზი +380 (63) 376 77 68; +380 (93) 761 17 17 

ამასთან საქართველოს დიპლომატიური წარმომადგენლობები მუდმივ რეჟიმში კონტაქტზე არიან ადგილზე მყოფ საქართველოს მოქალაქეებთან და მოუწოდებენ მათ გაითვალისწინონ შექმნილი რთული უსაფრთხოების გარემო. 

როგორც ცნობილია, აშშ, ევროკავშირის წვერი ქვეყნები მოუწოდებენ საკუთარ მოქალაქეებს დატოვონ უკრაინის ტერიტორია. 

შესაბამისად, შექმნილი ვითარებიდან გამომდინარე,  მოვუწოდებთ საქართველოს მოქალაქეებს კავშირზე დარჩნენ საქართველოს საელჩოსთან როგორც  ოპერატიული ინფორმაციის მიღების, ისე მოქალაქეების მხრიდან უკრაინის ტერიტორიის დატოვების  გადაწყვეტილების  შემთხვევაში  ლოჯისტიკური და საინფორმაციო მხარდაჭერისთვის", - ნათქვამია განცხადებაში. 

შეგახსენებთ, "ოცნებამ" უკრაინის მხარდასაჭერი რეზოლუცია, ისე შეიმუშავა და დაამტკიცა, რომ რუსეთის ხსენება ვერ გაბედა. რეზოლუცია პარლამენტმა 1-ელ თებერვალს მიიღო. მას ოპოზიციამ მხარი არ დაუჭირა.