აშშ-ში კორონავირუსით ინფიცირებულთა რაოდენობა 150 000-ს გადაცდა, გარდაიცვალა 2854 ადამიანი
აშშ-ში კორონავირუსით ინფიცირების დადასტურებულმა შემთხვევებმა 155,969-ს მიაღწია. ბოლო სამ დღეში ქვეყანაში 50 000-ზე მეტი ახალი შემთხვევა გამოვლინდა. 30 მარტის მონაცემებით, აშშ-ში ჯამში გარდაიცვალა 2854, ხოლო გამოჯანმრთელდა 5,211 ადამიანი.
აშშ ინფიცირებულთა რაოდენობით მსოფლიოში პირველ ადგილზეა. ვაშინგტონის უნივერსიტეტის ჯანდაცვის გაზომვისა და შეფასების ინსტიტუტის (IHME) მოდელირების თანახმად, აშშ-ში კორონავირუსით ერთ დღეში გარდაცვლილთა რიცხვი პიკს 15 აპრილს მიაღწევს. IHME-ს პროგნოზით, 16 ივლისს კორონავირუსით გარდაცვალების ახალი შემთხვევა აშშ-ში არ აღირიცხება. საბოლოო ჯამში, ინსტიტუტი ვარაუდობს, რომ ახალი კორონავირუსი აშშ-ში 4 აგვისტოსთვის 82 141 ადამიანს შეიწირავს.
აშშ-ის პრეზიდენტმა დონალდ ტრამპმა კორონავირუსის გამო შემოღებული ფედერალური დირექტივები მთელი ქვეყნის მასშტაბით 30 აპრილამდე გაახანგრძლივა. ტრამპის თქმით ეს დირექტივები, მათ შორის სოციალური დისტანცირება "არის გამარჯვების გზა".