აშშ-ში რუსეთის საელჩო თეთრი სახლის პრესსპიკერის, ჯენ ფსაკის კომენტარს ეხმიანება და აცხადებს, რომ ასეთი განცხადებები უსაფუძვლოა და მათი მიზანი რუსეთზე საინფორმაციო ზეწოლის განხორციელებაა.
„ვეხმიანებით თეთრი სახლის პრესმდივნის განცხადებას რუსეთის მიერ უკრაინაში შეჭრისთვის საბაბის მომზადების შესახებ. ადმინისტრაციის წარმომადგენლები უკვე დეტალურად აღწერენ მსგავსი პროვოკაციების სცენარებს და ასახელებენ „ოპერაციების“ დაწყების თარიღებს, როგორც ყოველთვის, მტკიცებულების გარეშე. ასეთი განცხადებები ადასტურებს ჩვენს ქვეყანაზე განუწყვეტელ საინფორმაციო ზეწოლას. მეტიც, იგივე სცენარი მეორდება: ხდება სენსაციის „ჩაყრა“, რომელსაც შემდეგ მედია იმეორებს და მთავარ ამბად აქცევს,“- ნათქვამია საელჩოს განცხადებაში.
მათი მტკიცებით, რუსეთი ომის წინააღმდეგია და მხარს უჭერს საერთაშორისო პრობლემების დიპლომატიურ გადაწყვეტას.
„გვინდა გავაფრთხილოთ ჩვენი კოლეგები მსგავს ავანტიურებთან დაკავშირებით. კიდევ ერთხელ ვაცხადებთ: აშშ-ში (როგორც ოფიციალურ დონეზე, ასევე მედიაში) ჩვენს მიმართ უწყვეტი ბრალდებები უსაფუძვლოა. მოვუწოდებთ შეერთებულ შტატებს ჩაერთოს არსებით სამუშაოებში, რათა უზრუნველყოს უსაფრთხოების გარანტიები რუსული მხარის მიერ შეთავაზებული შეთანხმებების პროექტების საფუძველზე. რუსეთი ომის წინააღმდეგია - ჩვენ მხარს ვუჭერთ ყველა საერთაშორისო პრობლემის დიპლომატიურ გადაწყვეტას,“- აღნიშნულია განცხადებაში.